ទង្វើអ្វីហ្នឹង! ដៀមដាមកីឡាករមិនអស់ចិត្ត ពេលនេះមានការចោទប្រកាន់ថា Barcelona មិនអាចទិញ Nico Williams ដោយសារកលល្បិចរបស់ប្រធាន La Liga ទៀត

ប្រធានលីគកំពូលអេស្ប៉ាញ លោក Javier Tebas កំពុងក្លាយជាចំណុចកណ្តាលនៃការរិះគន់ងើបមុខសឹងមិនរួច បន្ទាប់ពីមានការអះអាងថា លោក Tebas មានចេតនាទម្លាយព័ត៌មានសម្ងាត់មួយចំនួនរបស់ Barcelona ទៅកាន់ក្រុមការងាររបស់ Athletic Bilbao រហូតធ្វើអោយការផ្ទេរសម្រាប់កីឡាករ Nico Williams បរាជ័យយ៉ាងអាម៉ាស់។

កាលពីសប្តាហ៍មុន កីឡាករ Nico Williams បានប្រកាសជាផ្លូវការអំពីការបន្តកុងត្រាថ្មីរយះពេល 10 ឆ្នាំជាមួយ Bilbao ទាំងដែលធ្លាប់ធ្វើអោយគ្រប់គ្នាជឿថារូបគេនឹងផ្លាស់ទៅលេងនៅ Barcelona សម្រាប់រដូវកាល 2025-2026 ខាងមុខនេះ។ ដំណឹងមួយនេះ ធ្វើអោយអ្នកគាំទ្រ Barcelona កើតការមិនពេញចិត្ត នឹងតូចចិត្តជាខ្លាំង ចំពោះការផ្តល់ក្តីសង្ឃឹមក្លែងក្លាយរបស់ Nico Williams។

យ៉ាងណាក្តី ថ្មីៗនេះ ប្រភពមួយបានអះអាងថាមូលហេតុដែលការផ្ទេរមិនបានសម្រេចបែបនេះ គឺមានជាប់ពាក់ព័ន្ធជាមួយលោក​​ Javier Tebas ដែលជាប្រធានលីគកំពូលអេស្ប៉ាញ La Liga ទៅវិញ។ ប្រភពដដែលនោះបានទម្លាយថា លោក Tebas បានផ្តល់ឯកសារសម្ងាត់មួយចំនួនធំរបស់ Barcelona ទៅកាន់អ្នកតំណាងរបស់ Bilbao ជាពិសេសរបាយការណ៍ហិរញ្ញវត្ថុរបស់ក្លិប ដែលធ្វើអោយភាគីម្ខាងទៀតដឹងយ៉ាងច្បាស់ពីស្ថានភាពរបស់ Barcelona រហូតធ្វើអោយថ្នាក់ដឹកនាំ Bilbao មានអាទិភាពក្នុងការចរចារជាមួយ Nico Williams សម្រាប់កិច្ចសន្យារយះពេលវែងថ្មីមួយទៀត៕