អតីតខ្សែបម្រើរបស់ក្រុមតោខៀវ Chelsea នឹងក្រុមជម្រើសជាតិប្រេស៊ីល កីឡាករ Oscar ត្រូវបានគេជឿជាក់ថាកំពុងពិចារណាអំពីការចូលនិវត្តន៍ បន្ទាប់ពីត្រូវបាននាំចូលមន្ទីរពេទ្យដោយសារតែបញ្ហាបេះដូង។

ខ្សែបម្រើវ័យ 34 ឆ្នាំរូបនេះត្រូវបានគេចុះផ្សាយថា បានជួបប្រទះបញ្ហាបេះដូងអំឡុងពេលដែលធ្វើតេស្តជិះកង់អោយក្រុម Sao Paulo កាលពីពេលថ្មីៗនេះ។ ក្រោយឆ្លងកាត់ការត្រួតពិនិត្យយ៉ាងល្អិតល្អន់រួចមក ក្រុមគ្រូពេទ្យបានបញ្ជាក់អោយដឹងថា កីឡាកររូបនេះមានជម្ងឺមួយប្រភេទ ដែលធ្វើអោយរូបគេសន្លប់បាត់ស្មារតី នៅពេលដែលសម្ពាធឈាមធ្លាក់ចុះខ្លាំងពេក។

ប្រភពដដែលក៏បានបន្ថែមទៀតផងដែរថា ដោយសារតែរឿងរ៉ាវទាំងនេះ សាមីខ្លួនកីឡាករ Oscar កំពុងតែពិចារណាក្នុងការផ្តាច់កុងត្រាជាមួយក្លិប Sao Paulo ដែលមានសុពលភាពដល់ឆ្នាំ 2027 ហើយគ្រោងនឹងបញ្ជាក់ពីការសម្រេចចិត្តក្នុងការចូលនិវត្តន៍ពីបាល់ទាត់ជាផ្លូវការ បន្ទាប់ពីចាប់ផ្តើមលេងជាផ្លូវការដំបូងនៅឆ្នាំ 2008៕