ខ្សែការពាររបស់ក្រុមបិសាចក្រហម Manchester United កីឡាករ Leny Yoro ហាក់បានធ្វើការឌឺដងចំពោះអតីតកីឡាករមួយចំនួនជាខ្លាំង នៅពេលលើកសរសើរអំពីក្បួននៃការរៀបចំរបស់លោក Ruben Amorim។

ចាប់តាំងពីការមកដល់របស់គ្រូបង្វឹកសញ្ជាតិព័រទុយហ្កាល់រូបនេះ អ្នកគាំទ្របានចែកចេញជាពីរប្រភេទ ដោយមួយក្រុមធំបានកោតសរសើរចំពោះទម្រង់ នឹងការដឹកនាំរបស់លោក Amorim បើទោះបីជា Man United មិនទាន់បានលើកពានអស្ចារ្យអ្វីមួយទាល់តែសោះ ខណះអ្នកគាំទ្រមួយផ្នែកទៀតជឿជាក់ថា លោក Ruben Amorim​ គ្មានអ្វីពិសេសជាងគ្រូបង្វឹកចាស់ៗនោះឡើយ ដែលធ្លាប់សន្យាថាជួយកែប្រែមុខមាត់ក្លិប តែបែរជាធ្វើមិនបាន។

បើគិតមកទល់ពេលនេះ Man United ធ្វើបានល្អគួរសមនៅក្នុងលីគកំពូលអង់គ្លេស ជាពិសេសការយកឈ្នះ 3 ប្រកួតជាប់គ្នា មុនពេលស្មើជាមួយ Nottingham Forest ក៏ដូចជា Tottenham Hotspur។ ជុំវិញទម្រង់លេងបច្ចុប្បន្នរបស់ក្រុម កីឡាករ Leny Yoro បានលើកឡើងថា វាជាការចាប់ផ្តើមនៃផែនការកំពូលរបស់លោក Amorim ដោយកាត់ផ្តាច់អោយបាននូវបរិយាកាសមិនល្អ ហើយក្នុងនោះ Yoro ក៏បានលើកឡើងអំពីកីឡាករដែលជះឥទ្ធិពលមិនល្អសម្រាប់ក្រុម ដូចជាអត្តចរិត នឹងភាពខ្វះខាតនៃសុជីវធម៌នៅក្នុងក្រុម៕