ដំណឹងគួរឲ្យសោកសៅ ! លោកគ្រូតាក្រមាមាស សាន គឹមស៊ាន ព្រឹទ្ធាចារ្យក្បាច់ល្បុក្កតោ បានទទួលមរណភាព
ដំណឹងគួរឲ្យសោកសៅ ! លោកគ្រូតាក្រមាមាស សាន គឹមស៊ាន ព្រឹទ្ធាចារ្យក្បាច់ល្បុក្កតោ បានទទួលមរណភាពហើយ។ នេះបើតាមការបញ្ជាក់របស់លោក អ៊ូ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា៕
លោកគ្រូតាក្រមាមាស សាន គឺមស៊ាន កើតនៅថ្ងៃទី២៤ ខែមីនា ឆ្នាំ១៩៤៥ ក្នុងគ្រួសារមួយដែលមានលោកឪពុកឈ្មោះស៊ាន ស៊ៀ ជាអ្នកលក់កាហ្វេ គុយទាវ តាមកង់ និងម្ដាយឈ្មោះ យិន វ៉ាត់ (ហៅយាយពៀង) ជាមេផ្ទះ។ លោកមានបងប្អូនចំនួន១២នាក់ ហើយរូបលោកជាកូនពៅ ប៉ុន្តែជារឿងគួរឲ្យខ្លោចផ្សាបំផុតដែលបងប្អូនលោកបានបាត់បង់ជីវិតទាំងអស់ នៅសល់តែរូបលោកម្នាក់គត់ដែលមានសំណាងរស់រានមានជីវិតរហូតដល់សព្វថ្ងៃនេះ។ កាលពីកុមារភាព ជីវិតរបស់លោកពោរពេញដោយភាពឯកោ និងលំបាកវេទនាស្ទើរមិនអាចពណ៌នាបាន។
លោកបានចូលរៀនសាលាបឋមសិក្សាអង្គអេង មុនចូលថ្នាក់អនុវិទ្យាល័យនៅសាលាព្រះស៊ីសុវត្ថិ។ ក្រោយមក លោកតាបានផ្លាស់ទៅសិក្សានៅសាលារៀនឯកជនសុវណ្ណភូមិវិញ។ ឆ្នាំ១៩៦៦ លោកបានប្រលងបញ្ចប់ថ្នាក់មធ្យមសិក្សាទុតិយភូមិដោយជោគជ័យ។ ក្រោយពីបញ្ចប់ការសិក្សាកម្រិតវិទ្យាល័យ លោកតាបានចូលបម្រើការងារនៅក្នុងក្រុមភ្លេងរាជតម្រួតភិរម្យដែលជាក្រុមភ្លេងដង្ហែសម្ដេចព្រះវររាជបិតា នរោត្ដម សីហនុ រហូតដល់ឆ្នាំ១៩៧០។ ឆ្នាំនោះ លោកតាបានលាឈប់ពីការងារក្នុងក្រុមភ្លេងដោយសារតែរដ្ឋប្រហារទម្លាក់សម្ដេចពីរបបលន់ ណុល។ ក្រោយមកលោកតាក៏ភៀសខ្លួនទៅធ្វើជាទាហាននៅខេត្តកំពង់ស្ពឺ។
